Në mars të vitit 2026, gjatë muajit të Ramazanit, te Italoptik deshëm të bënim diçka me zemër: të nderonim komunitetin mysliman të Shqipërisë, komunitetin më të madh fetar të vendit tonë.
Ftuam rreth dhjetë gra, që janë pjesë e rëndësishme e komunitetit mysliman në Shqipëri, dhe shtruam së bashku iftarin te lokali “Te Arditi” në Mullet, pak jashtë Tiranës. Iftari është darka me të cilën çelet agjërimi në perëndim të diellit. U ulëm në të njëjtën tryezë, ndamë bukën dhe folëm gjatë.
Folëm për sfidat që kemi si gra dhe si nëna: për punën, për fëmijët, për kohën që nuk na mjafton kurrë dhe për forcën që na duhet çdo ditë. Folëm edhe për vendin që ka besimi në jetën tonë dhe në shoqërinë shqiptare, për mënyrën si na mban të lidhur me familjen dhe me njëri-tjetrin.
Unë jam e krishterë. E megjithatë, për mua është shumë e rëndësishme t’i nderojmë të gjitha komunitetet, e veçanërisht komunitetin mysliman, që përbën pjesën më të madhe të shqiptarëve. Shqipëria njihet në botë për harmoninë mes feve, dhe kjo harmoni nuk është diçka që vjen vetvetiu. Ndërtohet në tryeza si kjo, kur ulemi bashkë, dëgjojmë njëri-tjetrin dhe kuptojmë se kemi shumë më tepër gjëra të përbashkëta se sa mendojmë.
Faleminderit çdo gruaje që erdhi dhe ndau me ne historinë, mendimet dhe atë mbrëmje të veçantë. Ramazani na kujton vlerën e durimit, të mirënjohjes dhe të ndarjes me të tjerët, vlera që i ndajmë të gjithë.
Me dashuri,
Romina Lula dhe ekipi i Italoptik
